September 7 would have been the 90th. birthday of Miss Lou.
Dr. the Hon. Louise Simone Bennett Coverley
She was a thought leader that use her gifts of words and presence to influence the Jamaican culture to embrace its preciousness. In honor of her, we share one of her works.
Dutty Tough – Louise Bennett
Sun a shine but tings no bright;
Doah pot a bwile, bickle no nuff;
River flood but water scarce, yawl
Rain a fall but dutty tough.
Tings so bad dat nowadays when
Yuh ask smaddy how dem do
Dem fraid yuh tek it tell dem back,
So dem no answer yuh.
No care omuch we dah work fa
Hard-time still een we shut;
We dah fight, Hard-time a beat we,
Dem might raise we wages, but
One poun gawn awn pon we pay, an
We no feel no merriment
For ten poun gawn pon we food
An ten pound pon we rent!
Saltfish gawn up, mackerel gawn up.
Pork en beef gawn up,
An when rice and butter ready
Dem just go pon holiday!
We interrupt this fine work to share the wisdom of a passionate senior Jamaican.
Click to listen to Margret Marshall, capturing our legacy
Now please continue.
Claht, boot, pin an needle gawn up’
Ice, bread, taxes, water-rate
Kersene ile, gasolene, gawn up;
An de poun devaluate.
De price of bread gawn up so high
Dat we haffi agree
Fi cut we yeye pon bred an all
Tun dumplin refugee
An all dem marga smaddy weh
Dah gwan like fat is sin
All dem-deh weh dah fas wid me
Ah lef dem to dumpling!
Sun a shine an pot a bwile, but
Things no bright, bickle no nuff
Rain a fall, river dah flood, but,
Water scarce and dutty tough.